「去社區藥房配藥，藥劑師問我轉唔轉副廠藥，話成分一樣但平好多。

副廠藥到底係咩？效果同原廠藥有冇分別？食咗會唔會冇咁有效？」

相信唔少市民配藥時，聽到「副廠藥」三個字都會有所顧慮或好奇，就等我哋同你講清楚。

一、副廠藥係咩嚟？同原廠藥有咩關係？

• 原廠藥（Brand-name Drug）

藥廠由零開始研發新藥，花費數億美元同十年八年臨床試驗，成功後擁有專利權，獨家生產。

• 副廠藥（Generic Drug，通用名藥物）

當原廠藥專利期滿，其他合資格藥廠就可以根據公開嘅藥方，生產相同有效成分嘅藥物，就係我哋講嘅「副廠藥」。

即使公立醫院都會采購配發副廠藥，所以副廠藥的安全性與品質與原廠藥同樣有保障。

二、副廠藥安全嗎？效果會唔會差啲？

副廠藥申請香港藥物註冊時，必須提交生物等效性，簡稱 BE嘅研究報告。證明副廠藥食落肚之後，身體點樣吸收、幾時吸收、吸收幾多，都要同原廠藥幾乎一樣，先至可以獲准註冊，確保臨床療效同安全性都與原廠藥相若。

很多人以為副廠藥係「無名小廠」生產，但事實上，好多全球頂尖嘅原廠大藥廠，自己旗下都有龐大嘅副廠藥品牌，品質同控管都係國際最高標準：

• Sandoz（山德士）：

原本係全球頂級原廠藥廠 Novartis（諾華） 旗下嘅副廠藥事業部，香港公立醫院同社區藥房都大量採用

例：降血壓藥奧美沙坦 Olmesartan

• Viatris（暉致）：

暉致是由邁蘭(Mylan) 和輝瑞普強(Pfizer Upjohn) 於2020年11月合併而成的跨國醫療保健公司，專門生產高品質嘅副廠藥。

例：降膽固醇藥阿托伐他汀 Atorvastatin

• Teva（特華）：

全球數一數二嘅跨國藥企，產品遍佈全球醫院同藥房，品質對標國際最高規格。

例：降血壓藥替米沙坦 Telmisartan

三、社區藥房醫生紙配藥重要注意事項

• 必須出示處方正本：根據《藥劑業及毒藥條例》，配發處方藥物或相關副廠藥時，仍需帶同有效嘅醫生處方正本，方可辦理配藥手續。
• 處方替換條款限制：若處方正本上已明確標明指定原廠藥物，或沒有標明「除非特別指明，否則允許替換副廠藥」等字眼，藥劑師依法均不能隨意配發或替換為副廠藥。
• 遵從專業指示：每位患者的病情與體質不同，使用或切換任何藥物前，請務必遵從醫生或註冊藥劑師嘅專業意見同指示。