你有無聽過身邊有人傷風感冒郁啲就衝去公立醫院睇急症？寧願等幾個鐘先見到醫生？

其實，好似傷風感冒呢類小病小痛，除咗醫院醫生之外，仲有其他專業人士可以幫到你——就係社區藥房入面嘅註冊藥劑師！

一、到底乜嘢先算係「小病小痛」？ 

簡單嚟講，「小病小痛」就係一啲常見、對生命無即時危險、無需用到醫院大型儀器，而且多數短時間內會自行好轉嘅身體不適。例如：

• 呼吸道不適： 傷風、感冒、輕微咳嗽、流鼻水、初期的喉嚨痛
• 消化系統問題： 偶發性的消化不良、胃脹氣、輕微腹瀉、便秘
• 皮膚與五官問題： 蚊叮蟲咬、輕微濕疹發作、皮膚敏感、眼睛乾澀、生飛滋
• 常見痛症： 輕微的肌肉酸痛、經痛、短暫頭痛

遇到呢類情況，大家其實有比「喺急症室苦等」更輕鬆、更快捷、更精明嘅選擇！ 

二、 小病小痛唔去急症室，去邊度？答案係你身邊嘅「社區藥房」

過去，大家往往將醫院當成睇病嘅唯一終點站。其實，喺你屋邨、屋苑樓下嗰間掛住「℞」標誌嘅社區藥房，先係你最便利嘅健康第一站！ 

隨住政府推動《基層醫療健康藍圖》，社區藥房內嘅註冊藥劑師，唔止負責執藥，更係你嘅「藥物顧問」： 

1. 免費諮詢，隨到隨問： 突然頭暈身馨，你完全唔需要提前預約，直接行入藥房，就可以向着住白袍嘅藥劑師「傾兩句」，獲得佢地嘅專業建議。 
2. 量身打造，精準配藥： 藥劑師會細心詢問你的症狀、有沒有藥物敏感、平時有無食開長期病患藥物，然後為你挑選最適當嘅非處方藥物（OTC 藥物），仲會爲你仔細講解服藥方法。
3. 專業分流，安全把關 ： 如果藥劑師諮詢過程中，發現你嘅症狀可能隱藏其他風險，佢都可以幫你轉介醫生。甚至日常無論係公立定私家醫生開出嘅處方藥，其實最後都要由藥劑師進行最後的「雙重核對」，嚴格檢查確認藥物劑量、有無藥撞藥等問題。有藥劑師喺度做你嘅守門人，食藥自然放心得多！ 

認識多一個健康選擇，生活就多一份安心。下次遇到小病小痛，都可以去揾你嘅社區藥劑師傾傾啦！