【社區藥房説明書】去醫院、診所定社區藥房？選擇最適合你嘅醫療服務
身體唔舒服，好多時都諗：「應該去急症室？私家診所？定係落樓下藥房問吓藥劑師算？」其政府近年推動基層醫療，目標就係等大家「小病在社區」，嚴重危急嘅病先去急症室，等大家都可以。
以下用最簡單嘅方式，幫大家一次分清楚，下次唔舒服就知道去邊度最啱。
一、四者最大分別一覽
項目 | 醫院急症室／ 專科 | 私家診所／ 家庭醫生 | 家庭醫學診所 （公營） | 社區藥房 |
主要人員 | 醫生、護士、 專科團隊 | 醫生、護士 | 醫生、護士、跨專業團隊 | 註冊藥劑師 + 配藥員／助理 |
核心職責 | 處理危急、嚴重或複雜病情 | 診斷疾病、開處方、跟進病情 | 提供可負擔的診症及長期病跟進 | 藥物安全把關、用藥諮詢、小病支援 |
官方定位 | 第二、三層醫療 | 基層醫療核心選擇之一 | 公營基層醫療安全網 | 基層醫療的初始接觸點 |
適合情況 | 胸口劇痛、呼吸困難、突然半邊身無力、嚴重外傷、大量出血、意識模糊等危及生命嘅情況 | 持續發燒、喉嚨痛、咳幾日唔退、腸胃不適、皮膚出紅疹等需要醫生診斷嘅問題 | 糖尿、高血壓等穩定慢性病嘅定期覆診；感冒、腸胃炎等偶發性疾病（可經HA Go或電話預約24小時內診症） | 有醫生處方要配藥或了解用藥方法；想查詢藥物正確食法或注意事項；輕微不適想先問吓使唔使睇醫生；長期食藥想整理用藥紀錄；需要健康產品或醫療用品嘅使用建議 |
二、點樣判斷去邊度？
其實記住四句就夠：
- 危急嚴重 → 去醫院急症室
- 要醫生診斷 → 去私家診所／家庭醫生
- 要公營醫療服務或長期病跟進 → 去家庭醫學診所
- 用藥問題、輕微不適 → 先去社區藥房問藥劑師
如果長者自己唔肯定，家人可以幫手問幾個簡單問題：有冇呼吸困難、心口痛、半邊身唔郁得？有就即刻叫白車。係咪發燒、咳、痾，需要醫生睇吓？係就去診所。如果只係想知點樣食藥、有冇副作用，去社區藥房問藥劑師已經可以。
三、社區藥房可以幫到你咩？
好多街坊習慣一唔舒服就去診所，但其實有好多常見小毛病，藥房嘅藥劑師已經可以幫到手。
藥劑師同醫生嘅分工係咁嘅：醫生負責診斷疾病、判斷病情、開處方；藥劑師嘅專業係藥物嘅知識同應用——核實處方、配發藥物、解釋用法、檢查藥物有冇相沖。兩者相輔相成，各有職責。
社區藥房對你有咩好處？
- 唔使特登預約：行入舖頭就問得，唔使打電話book、唔使請假
- 藥劑師即時解答：用藥問題即刻有答案，唔使等
- 慳返診金：藥劑師諮詢費用全免，只係買藥先需要畀錢
- 藥劑師會把關：如果佢認為你需要睇醫生，會直接話你知，唔會延誤病情